EMMY NOETHER (1882 - 1935)

Emmy Noether foi unha matemática alemá de orixe xudía e unha das personalidades matemáticas máis importantes do século XX. Moitas persoas por todo o mundo continúan o seu traballo en Álxebra.

O 23 de marzo de 1882 naceu en Erlangen, Baviera, Emmy Amalie Noether. Foi a única alumna na Universidade de Erlangen entre 984 estudantes. En 1903, foi a Göttingen e en 1904 a Erlangen e realizou os seus estudos de doutoramento, sobre a teoría de invariantes. En 1907 obtivo o grao de doutora "cum laude" coa memoria titulada: Sobre los sistemas completos de invariantes para las formas bicuadráticas ternarias, que foi publicada en 1908.

Sobre ela dixo Jean Dieudonné que era "a mellor matemática do seu tempo, e un dos mellores matemáticos (home ou muller) do século XX". Na Sociedade Matemática de Moscova, o seu amigo Pavel Sergeevich Aleksandrov (1896-1982) recordábaa con este tributo: "Emmy Noether foi a máis grande das mulleres matemáticas, unha gran científica, magnífica profesora e unha inesquecible persoa".

Mediante a súa primeira especialización sobre invariantes alxébricos conseguiu demostrar dous teoremas esenciais para a teoría da relatividade que permitiron resolver o problema da conservación da enerxía e son coñecidos polos físicos como "Teorema de Noether".

A súa achega máis importante á investigación matemática foron os seus resultados sobre a axiomatización e o desenvolvemento da teoría alxébrica de aneis, módulos, ideais, grupos con operadores, etc., levando o seu nome os aneis noetherianos, grupos noetherianos...

Na década dos anos vinte iniciou unha serie de investigacións que modificaron a Álxebra desde os seus fundamentos. As súas publicacións serían suficientes para valorar a súa decisiva contribución ás Matemáticas, pero hai que considerar, ademais, que nunca lle interesou moito publicar e sempre permitiu aos seus colegas e aos seus estudantes desenvolver resultados interesantes a partir das suxestións que ela lles facía.

--------------------------------------