LEONARDO DE PISA (FIBONACCI) (ca. 1175 - 1250)

O matemático máis notable e produtivo de toda a Idade Media foi Leonardo de Pisa, coñecido tamén como Leonardo Pisano e "Fibonacci".

En 1192, o pai de Leonardo foi nomeado director dunha compañía comercial de Bugia (Alxeria) e nesta cidade Fibonacci recibiu os ensinos dun mestre árabe e aprendeu a calcular cos numerais indo-arábigos, que se usan na actualidade. Leonardo viaxou por Exipto, Siria, Grecia, Sicilia e polo sur de Francia, relacionándose con eruditos e estudosos das Matemáticas.

En 1200 Fibonacci regresou á súa Pisa natal e escribiu diversas obras de contido matemático, das que só se conservaron as seguintes: Liber Abaci (1202), Practica geometriae (1220), Flos (1225), Carta a Teodoro e Liber quadratorum (1225).

No Liber Abaci, Leonardo de Pisa deu un tratamento satisfactorio á Aritmética e á Álxebra. Ao longo dos quince capítulos do libro, móstrase como nomear e escribir os números no sistema indo-arábigo; desenvólvense métodos de cálculo con números naturais e fraccións; extráense raíces cadradas e cúbicas; obtéñense as solucións de ecuacións lineais e cuadráticas; resólvense problemas de troques, compañías, aligación, etc., e estúdanse cuestións prácticas de xeometría. Neste libro proponse o problema seguinte:

Cantas parellas de coellos produciranse nun ano, a partir dunha parella, se cada mes calquera parella procrea outra, que se reproduce á súa vez desde o segundo mes?

A resolución da cuestión anterior conduce á famosa sucesión de Fibonacci: 1, 1, 2, 3, 5, 8, 13, 21, 34, 55, 89, 144,... na que cada termo, a partir do segundo, é igual á suma dos dous anteriores.

Aínda que poida parecer estraño, atopamos a sucesión de Fibonacci na disposición helicoidal das follas no talo (filotaxia), nalgunhas inflorescencias das flores compostas, nunha fonte deseñada polo matemático e escultor norteamericano Helaman Ferguson, nunha cheminea da cidade finlandesa de Turku, en dúas esculturas do australiano Andrew Rogers localizadas en Xerusalén e no deserto de Arava (Israel), ...

--------------------------------------

Meses…

Número de parellas de coellos…